அமெரிக்காவிடம் ஒசாமாவின் இறப்பு சான்றிதழை கேட்ட மகன்: அம்பலப்படுத்திய விக்கிலீக்ஸ்

தினமலர் செய்தி : ரியாத் : அவ்வப்போது முக்கியமான, ரகசிய ஆவணங்களை வெளியிட்டு பரபரப்பை ஏற்படுத்தும் விக்கிலீக்ஸ் நிறுவனம், தற்போது சவுதி அரேபிய தூதரக ஆவணங்களை வெளியிட்டுள்ளது. இதில் ஒசாமா பின்லேடனின் மகன், தனது தந்தை இறந்து விட்டதற்கான சான்றிதழ் தர வேண்டும் என அமெரிக்க நிர்வாகத்திற்கு எழுதி உள்ள கடிதமும் வெளியிடப்பட்டுள்ளது.

சவுதி அரேபிய தூதரகத்திற்கு வந்துள்ள ஏறக்குறைய 5 லட்சத்திற்கும் அதிகமான ஆவணங்களை விக்கிலீக்ஸ் தனது இணையதளத்தில் வெளியிட்டுள்ளது. ஏற்கனவே 60,000 ஆவணங்களை வெளியிட்டுள்ள விக்கிலீக்ஸ், ரியாத்தில் உள்ள அமெரிக்க தூதரகத்திற்கு சர்வதேச பயங்கரவாதி ஒசாமா பின்லேடனின் மகன் எழுதி கடிதத்தையும் வெளியிட்டுள்ளது. அப்துல்லா பின் லேடன், ரியாத்திற்கான அமெரிக்க தூதர் கிலின் கெய்சருக்கு இந்த கடிதத்தை எழுதி உள்ளார். அப்துல்லாவின் கடிதத்திற்கு பதில் அனுப்பி உள்ள கெய்சர், பயங்கரவாத அழிப்பு நடவடிக்கையில் இத்தகைய கொலைகள் சகஜமானவை என குறிப்பிட்டதுடன், ஒசாமா இறந்து விட்டதற்கான சான்றிதழையும், அதற்கான அமெரிக்க கோர்ட்டின் ஆவணங்களையும் அனுப்பி உள்ளார். இவைகளை விக்லீக்ஸ் வெளியிட்டுள்ளது.

சவுதி அரேபியா வெளியுறவு அமைச்சகத்தின் ஆவணங்கள் பலவற்றையும் விக்கிலீக்ஸ் வெளியிட்டுள்ளது. இவற்றில் பெரும்பாலானவைகள் அரேபிய மொழியிலும், பச்சை நிற மையினாலும் எழுதப்பட்டுள்ளது. இந்த ஆவணங்களில் சிரியா கிளர்ச்சியாளர்களும், எகிப்திய பயங்கரவாதிகளும் அரசின் பின்னணியில் இருப்பது தெரிய வந்துள்ளது. சவுதி அரேபியாவின் ஈரானுடனான அணுஆயுத பேச்சுவார்த்தைகள், முன்னாள் அதிபர் ஹோஸ்னி முபாரக் விவகாரம் என பல ரகசியங்களும் அம்பலப்படுத்தப்பட்டுள்ளது.

அரசின் ரகசிய ஆவணங்களை வெளியிட்டதற்காக சவுதி அரேபியா அரசு விக்கிலீக்சிற்கு கடும் கண்டனம் தெரிவித்துள்ளது. ஏற்கனவே அமெரிக்காவின் உளவு ரகசியங்களை வெளியிட்டு சர்ச்சையை ஏற்படுத்திய விக்கிலீக்ஸ், தற்போது சவுதி அரேபியாவின் வெளியுறவு அமைச்சக ஆவணங்களை வெளியிட்டுள்ளது உலக நாடுகள் பலவற்றை அதிர்ச்சி அடைய வைத்துள்ளது.