தினமலர் செய்தி : கூட்டுறவு சங்கங்களுக்கு, அரசு மானியம் வழங்கப்படாததால், மாதத்திற்கு, 5,000 ரேஷன் கடைகளை மூட வேண்டிய அவல நிலை ஏற்பட்டுள்ளது. தமிழகத்தில், மொத்தம் உள்ள, 33,973 ரேஷன் கடைகளில், 31,863 கடைகள், 4,500 தொடக்க வேளாண்மை கூட்டுறவு சங்கங்கள் மூலம் நடத்தப்படுகின்றன.
இதுகுறித்து, உணவு மற்றும் கூட்டுறவு துறை அதிகாரி ஒருவர் கூறியதாவது: கடந்த, நான்கு ஆண்டு களில், கூட்டுறவு துறைக்கு, அரசிடம் இருந்து, 480 கோடி ரூபாய் மானியம் வர வேண்டும். ஆனால், கடந்த ஆண்டு பிப்., மாதம், 120 கோடி ரூபாய் மட்டும் வழங்கப்பட்டது. மீதி தொகை, இதுவரை வழங்கவில்லை.ரேஷன் கடைக்கு, வாடகை கொடுக்க முடியாததால், கட்டட உரிமையாளர்கள், கடையை காலி செய்யுமாறு கூறுகின்றனர். ஊழியர்களுக்கும், சம்பளம் நிலுவை வைக்கப் பட்டுள்ளது. இதனால், அவர்கள், முறைகேடுகளில் ஈடுபடுகின்றனர். தற்போது, ஒரே நேரத்தில், அனைத்து ரேஷன் கடைகளையும், மூட வாய்ப்பு இருந்தும், அப்படி செய்ய கூடாது என்பதால், சிரமத்துடன் அவற்றை நடத்தி வருகிறோம். இதே நிலை நீடித்தால், அடுத்த மாதம் முதல், மாதந்தோறும், 5,000 கடைகளை மூட வேண்டிய, இக்கட்டான நிலை ஏற்படும். எனவே, 360 கோடி ரூபாய் மானியம், உடனடி யாக கிடைத்தால், இந்த பிரச்னைக்கு முற்றுப்புள்ளி வைக்கப்படும். இவ்வாறு, அவர் கூறினார்.
கட்டாய விற்பனை ஏன்?
கூட்டுறவு சங்கங்களின் செலவை சமாளிப்பதற்காக தான், அவற்றின் கீழ் நடத்தப்படும், ரேஷன் கடைகளில், அரிசி, சர்க்கரை வாங்கும் பொதுமக்களிடம், மளிகை பொருட்கள் உள்ளிட்ட இதர பொருட்கள், கட்டாயப்படுத்தி விற்பனை செய்யப்படுவதாக கூறப்படுகிறது.
Comments