ஜெ.,விடுதலை! சிறையில் இருந்து வெளியேற கோர்ட் அனுமதி

பெங்களூரு: சொத்துக்குவிப்பு வழக்கில் பெங்களூரு சிறையில் அடைக்கப்பட்ட ஜெ., இன்று ஜாமினில் வெளியேற சிறப்பு நீதிபதி ஜான் மைக்கேல் குன்கா உத்தரவிட்டார். முன்னதாக ஜெ.,வை வரவேற்க தமிழக முதல்வர் ஓ.பன்னீர்செல்வம் பெங்களூரு பரபரப்பன அக்ரஹார சிறைக்கு வந்தார்.

இவர் 6 கார்களுடன் வந்தபோது பெங்களூரு போலீசார் அவரது காரை மட்டும் அனுமதித்தனர். ஏனைய கார்கள் சிறைக்கு தொலைவில் நிறுத்தப்பட்டன. சிறை வளாகத்தில் முதல்வர் ஓ.பி.எஸ்., காத்து நிற்கிறார். மதியம் 1. 30க்கு மேல் 3 மணிவரை எமகண்டம் என்பதால் ஜெ., சிறையில் இருந்து 12.30லிருந்து 1.30க்குள் வெளியேறுவார் என தெரிகிறது. சுப்ரீம் கோர்ட் ஜெ.,வுக்கு நேற்று ஜாமின் வழங்கியதை அடுத்து இதற்கான உத்தரவு நகல் மற்றும் தனிநபர் ஜாமின் உத்தரவாதம் உள்ளிட்ட ஆவணங்கள் கோர்ட்டில் தாக்கல் செய்யப்பட்டன. ஜெ., தரப்பில் நவநீத கிருஷ்ணன் உள்ளிட்ட வக்கீல்கள் ஆஜராகினர்.
யார் ? யார் உத்ரவாதம்: இன்று காலை 11 மணிக்கு நீதிபதி குன்கா கோர்ட்டுக்கு வந்தார். ஆவணங்களை பரிசீலித்த நீதிபதி உத்தரவாதம் அளிக்கிறீர்களா? கோர்ட் கூறியபடி மீறினாலோ, குற்றவாளி வேறு எங்கும் ஓடினாலோ உங்களின் சொத்துக்களை பறிமுதல் செய்யலாமா என்றும் கேள்வி கேட்டார். அதற்கு அவர்கள் சம்மதம் தெரிவித்தனர். இதனையடுத்து ஜாமினில் வெளியேற நீதிபதி உத்தரவிட்டார்.
ஜெ.,வுக்கு பரத், குணஜோதி புகழேந்தி என்ற இருவர் தனிநபர் உத்தரவாதம் அளித்தனர். இதில் பரத் தனது ரூ. 5 கோடிக்கான சொத்தையும், குணஜோதி புகழேந்தி ரூ.1 கோடி சொத்து இருப்பதாகவும் கோர்ட்டில் தங்கள் சொத்துக்கள் ஆவணங்களை ஒப்படைத்தனர். இது போல் சசிகலாவுக்கு ராஜீவ், லட்சுமிபதி ஆகிய இருவரும், இளவரசிக்கு, புகழேந்தி, ராஜேந்திரன் என்ற இருவரும், சுதாகரனுக்கு லோகேஷ், அன்பாம்பாள் ஆகிய இருவரும் கோர்ட்டில் தனிநபர் உத்தரவாதம் அளித்தனர். தொடர்ந்து இந்த உத்தரவு நகலை சிறைத்துறை அதிகாரிகளிடம் ஒப்படைத்து இன்னும் சில மணி நேரத்தில் பெங்களூரு சிறையில் இருந்து ஜெ., வெளியேறுவார் என தெரிகிறது.
இதற்கிடையில் பாதுகாப்பு கருதி தமிழக பதிவு வாகனங்கள் கர்நாடக எல்லைக்குள் நுழைய தடை விதிக்கப்பட்டுள்ளது. சிறை வெளியே தொண்டர்கள் பலர் கூடி நிற்கின்றனர்.