கூட்டுறவு வங்கிகள் மூலம் கல்விக்கடன் வழங்க ஆய்வு: 312 அறிவிப்புகளை வெளியிட்டார் முதல்வர்

சென்னை: கலெக்டர், போலீஸ் அதிகாரிகள் மாநாடு நிறைவு நாளில், முதல்வர் ஜெயலலிதா, புதிதாக, 312 அறிவிப்புகளை வெளியிட்டார்.

சென்னை, தலைமைச் செயலகத்தில், மூன்று நாட்கள் நடந்த, கலெக்டர் மற்றும் போலீஸ் அதிகாரிகள் மாநாடு, நேற்று மாலை, நிறைவு பெற்றது. நிறைவு நிகழ்ச்சியில், முதல்வர் ஜெயலலிதா, 312 அறிவிப்புகளை வெளியிட்டார்.

அவற்றில் முக்கியமானவை:

* தற்போது, கன்னக்கொள்ளை மற்றும் திருட்டில், திருடு போன பொருட்களின் மதிப்பு, 2 லட்சம் ரூபாய்க்கு மேல் இருந்தால், அது கடும் குற்றமாக கருதப்படுகிறது. இத்தொகை மதிப்பை, 3 லட்சம் ரூபாயாக உயர்த்த, திருத்தம் கொண்டு வரப்படும்.
* மதுரை கன்னியாகுமரி சாலையில், திருநெல்வேலியையும், பாளையங்கோட்டையும் இணைக்கும் வகையில், தாமிரபரணி ஆற்றின் குறுக்கே, பழைய பாலம் அருகே, புதிய உயர்மட்ட பாலம் கட்டப்படும்.
*திருவண்ணாமலையில், மத்திய பேருந்து நிலையம் அமைக்கப்படும். ஒன்பது முக்கிய சாலைகளில், கார் நிறுத்தம் ஏற்படுத்தப்படும். படவேடு ஊராட்சியில், கமண்டலநாகநதி குறுக்கே, உயர்மட்ட பாலம் அமைக்கப்படும்.
* புதுக்கோட்டை மாவட்டத்தில், பொன்னமராவதி போலீஸ் நிலையம், திருமயம் அனைத்து மகளிர் போலீஸ் நிலையம், ஆகியவற்றுக்கு, புதிய கட்டடம் கட்டப்படும்.
*பெரம்பலூர் மாவட்டம், வேப்பந்தட்டை கிராமத்தில், கலை மற்றும் அறிவியல் கல்லூரி துவக்கப்படும்.
* வாகன விபத்தில், இறப்போர் குடும்பத்திற்கு, இழப்பீட்டு தொகையாக, 50,000 ரூபாய், காயமடைந்தோருக்கு 10,000 ரூபாய் வழங்கப்படுகிறது. இத்தொகை, 2 லட்சம் மற்றும், ஒரு லட்சமாக உயர்த்தி வழங்கப்படும்.
*நீலகிரி மாவட்டத்தில், முதல் வகுப்பு முதல், ஐந்தாம் வகுப்பு வரை படிக்கும் மாணவர்களுக்கு, முழு பேன்ட், முழுக்கை சட்டை, மாணவியருக்கு சல்வார் கமீஸ், ஓவர்கோட் வழங்கப்படும்.
* குன்னூர் நகராட்சிக்கு, எமரால்டு அணையிலிருந்து, குடிநீர் வழங்க நடவடிக்கை எடுக்கப்படும்.
* 50 குடியிருப்புகளுக்கு மேல் உள்ள ஊராட்சிகளுக்கு, "தாய்' திட்டத்தில் வழங்கப்படும் நிதி, உயர்த்தி வழங்கப்படும்.
* மலையில் பணிபுரியும் அரசு ஊழியர்களுக்கு வழங்கப்படும், ஊக்கத்தொகை, 1,500 ரூபாயாகவும், குளிர்காலப் படி, 500 ரூபாயாகவும், உயர்த்தி வழங்கப்படும்.
* வைகை நதியில், வாலிபாறை, கோவிந்தநகரம் பகுதியில், தடுப்பணை கட்டப்படும்.
* சிவகங்கை அரசு மருத்துவக் கல்லூரி மருத்துவமனை, மதுரை அரசு ராஜாஜி மருத்துவமனையில், "அம்மா உணவகம்' திறக்கப்படும்.
* சிவகங்கை மாவட்டம், அமராவதிபுதூர், பூசலகுடி பகுதியில், துணை மின் நிலையம் அமைக்கப்படும்.
* திருவள்ளூர் மாவட்டம், பூந்தமல்லி நகராட்சியில், பாதாள சாக்கடை திட்டம் அமல்படுத்தப்படும்.
* திருவள்ளூரில், நவீன ஒருங்கிணைப்பு பஸ் நிலையம், புதிதாக உருவாக்கப்படும்.
* திருவொற்றியூர், மதுரவாயலில், புதிதாக தாலுகா கட்டடம் கட்டப்படும்.
*திருத்தங்கல் ஆரம்ப சுகாதார நிலையம், தாலுகா தலைமை மருத்துவமனையாக, தரம் உயர்த்தப்படும்.
* சிவகாசி அடுத்த ஆடையூர் ஊராட்சியில், சிவகாசி தென்காசி சாலையில், ரயில்வே மேம்பாலம் கட்டப்படும். அதேபோல், ராஜபாளையம் நகராட்சிப் பகுதியில், ராஜபாளையம் தென்காசி சாலையில், ரயில்வே மேம்பாலம் கட்டப்படும்.
* திருவாரூர் மாவட்டத்தில், எட்டு குளங்கள் புனரமைக்கப்படும்.
* திண்டுக்கல் மாவட்டத்தில், கொடகனார் ஆற்றின் குறுக்கே, இரண்டு தடுப்பணை, சந்தானவர்தனி ஆற்றின் குறுக்கே, மூன்று தடுப்பணை கட்டப்படும்.
* மகாமகத்தையொட்டி, கும்பகோணம் நகராட்சிக்குட்பட்ட பகுதியில், அடிப்படை வசதி மற்றும் உட்கட்டமைப்பு வசதிகள் மேற்கொள்ளப்படும்.
* கூட்டுறவு வங்கிகளில், கல்விக் கடன் வழங்குவது குறித்து, ஆய்வு செய்து முடிவு அறிவிக்கப்படும்.
* ராமநாதபுரம் மாவட்டத்தில், 1,200 குடிநீர் ஊரணிகள், 755 ஊராட்சி ஒன்றிய குளங்கள், 437 முன்னாள் ஜமீன் குளங்கள், ஆகியவை சீரமைக்கப்படும்.
* ராமேஸ்வரத்தில், மீன்பிடித் துறைமுகம் அமைக்கப்படும்.
* தனுஷ்கோடி, டி.மரியூர், பாம்பன், முகுந்தரயசத்திரம், தங்கச்சிமடம், வேதாளை, ஆகிய இடங்களில், மீன் இறக்கு மையம் அமைக்கப்படும்.
* சேலம் மாவட்டம், பனைமரத்துபட்டி மற்றும் தலைவாசல் பகுதியில், விதை கிடங்கு அமைக்கப்படும்.
* காஞ்சிபுரம் மாவட்டம், பாலூரில் பாலாற்றின் குறுக்கே, தடுப்பணை கட்டப்படும்.
* செங்கல்பட்டு போலீஸ் சப் டிவிஷனலிருந்து, வண்டலூரை தலைமையிடமாகக் கொண்டு, தனி சப் டிவிஷன் உருவாக்கப்படும்.
* சென்னையில், புதிதாக ஐந்து தாலுகா அலுவலகங்கள் கட்டப்படும்.
* வேலூர் சிறையில், டி.ஐ.ஜி., பணியிடம் ஏற்படுத்தப்படும்.