என் இளமையின் ரகசியம் யோகா, தியானம்தான் - ஸ்ரேயா

உனக்கு 20 எனக்கு 18 படத்தில் தமிழுக்கு வந்தவர் ஸ்ரேயா. அதன்பிறகு ஜெயம்ரவியுடன் நடித்த மழை படத்தில் மழையில் நனைந்தபடி இவர் ஆடிய கலக்கல் ஆட்டம் தமிழக இளவட்ட ரசிகர்களை கலக்கி எடுத்தது. அதனால் அந்த படத்திலிருந்தே ஸ்ரேயாவுக்கென்று ஒரு ரசிகர் வட்டம் உருவானது. அதன்பிறகு ரஜினியுடன் சிவாஜி படத்தில் நடித்ததின் மூலம் டாப்மோஸ்ட் ஹீரோயினியானார் ஸ்ரேயா.

இருப்பினும் அந்த பெயரை அவரால் நீண்டகாலம் தக்க வைத்துக்கொள்ள முடியவில்லை. வேகமாக ஏறிய மார்க்கெட் அதே வேகத்தில் இறங்கி விட்டதால், பின்னர் சரியான படங்கள் இன்றி மீண்டும் தெலுங்கு, கன்னடம் என்று செல்ல வேண்டிய கட்டாயத்துக்கு ஆளானார் நடிகை. ஆனால், இந்த நேரத்தில் மாதக்கணக்கில் படமே இல்லாமல் அவர் வீடே கதியென்றும் இருந்திருக்கிறார்.

ஆனபோதும், தனது உடல்கட்டை சரியாக மெயின்டெயின் பண்ணி வந்திருக்கிறார் ஸ்ரேயா. இதன் காரணமாகத்தான் தற்போது நாகார்ஜூனாவின் மனம் மெகா படத்தில் நடிப்பதற்கு ஸ்ரேயாவுக்கு வாய்ப்பு கிடைத்துள்ளதாம்.

இந்த நிலையில், சினிமாவுக்கு வந்து கிட்டத்தட்ட 10 வருடங்கள் ஆகி விட்டபோதும், இன்னும் உடல்கட்டை அப்படியே இளமையாக வைத்திருப்பதின் ரகசியம் குறித்து சில இளவட்ட நடிகைகள் அவரிடம் கேட்டபோது, தினமும் நான் கடைபிடித்துவரும் யோகா மற்றும் தியான பயிற்சிதான் என் இளமையின் ரகசியம் என்றாராம் ஸ்ரேயா. அதோடு, தினமும் ஜிம்முக்கு சென்று வியர்வை சொட்ட சொட்ட உடற்பயிற்சி செய்வதை விட யோகா பயிற்சி பெரிய பலனை தருகிறது என்றும் அனுபவத்தை சொன்னாராம் ஸ்ரேயா.